Litva Basketbol Federasiyasının prezidenti Mindauqas Balçiunas vəzifəsindən istefa verib.

Prosport.Az delfi.lv saytına istinadən xəbər verir ki, Balçiunas ölkə basketbolunda son vaxtlar yaranan qalmaqallar və artan ictimai təzyiq fonunda belə qərar qəbul edib.

Litva milli komandasının baş məşqçisi, daha əvvəl “Sabah”a rəhbərlik etmiş Rimas Kurtinaytislə bağlı narazılıqlar da federasiyada yaranmış gərginliyin əsas mövzularından birinə çevrilib. Bir sıra aparıcı basketbolçunun Kurtinaytisin rəhbərliyindən narazı olduğu bildirilir. Bu səbəbdən, milli komanda son dünya çempionatı seçmə oyunlarına əsas heyətindən məhrum vəziyyətdə çıxıb.

Litva basketbolunda digər ciddi qalmaqal isə qadınlardan ibarət milli komandanın sabiq baş məşqçisi Rimantas Qriqasla bağlıdır. O, cinsi təqib ittihamları səbəbindən FIBA tərəfindən basketbolla bağlı fəaliyyətdən 5 il müddətinə uzaqlaşdırılıb. Xanım basketbolçularla aparılmış anonim sorğuda Qriqasın həddindən artıq nəvazişli rəftarı və buna uyğun sözlərdən istifadə etməsi üzə çıxıb.

Yaranmış vəziyyət fonunda Balçiunas ictimai təzyiqin artıq dözülməz həddə çatdığını açıqlayıb: “İctimai aqressiyanın elə həddə çatdığını etiraf etməliyəm ki, bunun nəticələrini proqnozlaşdırmaq getdikcə çətinləşir. Buna görə də ictimai gərginliyi azaltmaq üçün addım atmalı olduğumu düşünürəm. Bazar ertəsi fəaliyyətimi dayandıracaq və federasiya prezidentinin səlahiyyətlərini qurumun nizamnaməsinə uyğun olaraq böyük vitse-prezidentə təhvil verəcəyəm”.

O, qərarının ictimaiyyətin emosiyalarını sakitləşdirməyə və yaranmış problemlərin sülh yolu ilə həllinə imkan verəcəyinə ümid etdiyini deyib.

Qeyd edək ki, Mindauqas Balçiunas 2024-cü ildən Litva Basketbol Federasiyasına rəhbərlik edirdi.