22-31 oktyabr tarixlərində Bakıda keçiriləcək 15 yaşadək (U-15) oğlan futbolçuların dünya çempionatı və festivalı ilə bağlı müəyyən məsələlərə aydınlıq gəlib.

Prosport.Az bununla bağlı yeni məlumatlar öyrənib.

Yarış üçün 175-dən artıq ölkənin 20 nəfərdən artıq nümayəndə heyəti Bakıya gələcək. Bakıya gələnlər arasında Ermənistan U-15 millisi də olacaq. Burada futbolu zəif olan Hindistan, Nepal, Sent Kitts və Nevis kimi ölkələrin iştirak edəcəyi dəqiqdir.

Bütün qonaqlar Heydər Əliyev prospektində yerləşən Atletlər Kəndində məskunlaşacaq. Onların qidalanması da orada təşkil ediləcək. 

Oyunlar Suraxanı rayonunun Hövsan qəsəbəsində baş tutacaq. Bunun üçün dövlət tərəfindən Hövsanda Akademiya səviyyəsində mini meydançalar tikilməyə başlanılıb. Böyük ehtimalla, bu ayın sonlarınadək orada təmir başa çatdırılacaq.

Matçların sayı 900-1000 aralığında olacaq. İlk dəfə keçiriləcək yarış üçün FIFA tərəfindən bütün üzv assosiasiya/federasiyalara (211) müraciət edilib. Bu səbəbdən iştirakçı sayı gözləniləndən çox olub. Ona görə də hələ ki FIFA tərəfindən oyunların formatının necə olacağı açıqlanmayıb.

Bu ay format və iştirakçı sayına tam aydınlıq gələcəyi gözlənilir.

Qeyd edək ki, 2027-ci ildə qız U-15 futbolçular arasında dünya çempionatı da başqa ölkədə keçiriləcək. 2028-ci ildən isə həm oğlan, həm də qız U-15 dünya çempionatı eyni ildə keçirilməyə başlanacaq.