Azərbaycan karateçiləri İstanbulda keçirilən “Turkish Open” beynəlxalq karate turnirində 2 gümüş medal qazanıblar.

Prosport.Az xəbər verir ki, 27 ölkədən 1100-ə yaxın idmançının iştirak etdiyi yarışda "Qaraqaplan Karate Klubu"nun idmançısı Qəhrəman Rzaquliyev (12-13 yaş) 45 kq çəki kateqoriyasında 5 görüş keçirərək finala yüksəlib. Şəxsi məşqçisi Asiman Qurbanlının rəhbərliyi altında çıxış edən Qəhrəman finalda Özbəkistan təmsilçisinə məğlub olaraq 2-ci yeri tutub.

"Arpaçay Karate Klubu"nun idmançısı Ömər Məmmədrəhimov isə kata üzrə 16-17 yaş kateqoriyasında finala yüksələrək gümüş medal qazanıb. Onun şəxsi məşqçisi Roman Heydərov, yığma komandanın baş məşqçisi isə Vüqar Kərimovdur.

Beləliklə, Azərbaycan təmsilçiləri “Turkish Open” turnirini 2 gümüş medalla başa vurublar.