Slovakiyanın paytaxtı Bratislavada güləş üzrə U-20 dünya çempionatı davam edir.

Prosport.Az xəbər verir ki, yarışın üçüncü günündə yunan-Roma güləşi üzrə 60 və 82 kq, qadın güləşi üzrə isə 50, 53 və 72 kq çəki dərəcələrində finalçılar müəyyənləşib.

Azərbaycan millisinin üzvü Ayxan Cavadov (60 kq) yarışa inamlı başlayıb. Dünya çempionumuz ilk görüşdə fransalı Maqomed Varayevi 9:0 hesabı ilə məğlub edərək 1/4 finala yüksəlib. O, bu mərhələdə braziliyalı Pedro Enrike de Souza Rodriqesi 6:2 hesabı ilə üstələyib.

A.Cavadov yarımfinalda iranlı Əmirəli Heydərini 4:3 hesabı ilə məğlub edərək ardıcıl ikinci dəfə U-20 dünya çempionatının finalına vəsiqə qazanıb. Güləşçimiz sabah həlledici görüşdə özbəkistanlı Dostonbek Oripovla qarşılaşacaq.

Elmin Əliyev (82 kq) isə ilk iki görüşündə gürcüstanlı Luka Pipiya və yaponiyalı Rondo Kodamaya 8:0 hesabı ilə qalib gəlib. O, 1/4 finalda özbəkistanlı Bekmurod Rustamovu 1:1 hesablı görüşdə ilk xal prinsipi ilə məğlub edib. Təmsilçimiz yarımfinalda belaruslu Kiril Valevskiyə 4:7 hesabı ilə uduzub. E.Əliyev sabah bürünc medal uğrunda mübarizə aparacaq. Onun rəqibi Mohammed Şaban (Misir), İsmayıl Bərəkət (Türkiyə) və ya Severi Maeenpaeae (Finlandiya) olacaq.

Qadın güləşçimiz Esra Məmmədli (53 kq) isə təsnifat mərhələsində qazaxıstanlı Dinara Dauylkızıya 1:7 hesabı ilə məğlub olaraq mübarizəni dayandırıb.

Zəhra Kərimzadə (72 kq) 1/4 finaldan yarışa qoşulub. O, türkiyəli İlayda Çini “tuş”la məğlub etsə də, yarımfinalda hindistanlı Tanu Şarmaya 0:11 hesabı ilə uduzub. Zəhra bürünc medal uğrunda Liliana Kazmina (Rusiya) – Petra Mueller (Macarıstan) görüşünün qalibi ilə qarşılaşacaq.