Slovakiyanın paytaxtı Bratislavada güləş üzrə U-20 dünya çempionatı davam edir.

Prosport.Az xəbər verir ki, 2-ci yarış günündə yunan-Roma güləşində ilk medalçılar müəyyənləşib.

Tural Əhmədov (63 kq) təsəlliverici görüşdə finlandiyalı Matias Arpiaynenə heç bir şans tanımayıb – 8:0. Axşam seansında ekvadorlu Klizman Velisi minimal fərqlə (2:1) üstələyən Əhmədov dünya 3-cüsü olub.

Cavidan Nehmətov (77 kq) isə finalda ermənistanlı Samvel Terteryanla qarşılaşıb. Rəqibinə ilk xal prinsipinə əsasən (1:1) məğlub olan idmançımız gümüş medalı boynundan asıb.

Bu gün mübarizəyə qoşulan güləşçilərimizdən Emin Cavadlı (55 kq) sabah bürünc medal görüşündə Jiale Li (Çin) – Hiro Sakamoto (Yaponiya) qarşılaşmasının qalibiylə güləşəcək.

Digər 3 güləşçimiz isə mübarizəni 1/8 final mərhələsində dayandırıb. Murad Əliyev (67 kq) Ermənistan təmsilçisi Yurik Mxitaryana 6:13, Kamran Rəcəbli (72 kq) özbəkistanlı Behruzbek Vəliyevə 0:8 və Rihad İbrahimli (97 kq) isə yaponiyalı Ryozey Katamatsuya 1:4 hesabıyla məğlub olub.