Serbiyanın Loznitsa şəhərində oğlan boksçular arasında U-19 Avropa çempionatında 1/8 final mərhələsinə yekun vurulub.

Prosport.Az xəbər verir ki, mərhələnin son günündə Azərbaycan millisinin daha 3 idmançısı adını 1/4 finala yazdırıb.

Nihat Qasımov (55 kq) ikinci döyüşündə Doryan Kropoqu (Çexiya) sınağa çəkib. Döyüş təmsilçimizin qələbəsi ilə başa çatıb. Qasımov üçüncü raundda tam üstünlüklə qələbə qazanıb. O, 1/4 Ruben Hucmannla (İngiltərə) münasibətinə aydınlıq gətirəcək.

Əli Baxışov (60 kq) da növbəti qələbəsini qazanıb. Boksçumuz bu dəfə Petar Krpanı (Xorvatiya) mübarizədən kənarlaşdırıb – 5:0 (30:27, 30:27, 30:27, 30:27, 30:27). O, yarımfinala gedən yolda Kristian Haraşiklə (Slovakiya) döyüşəcək.

Şahin Aslanov (65 kq) da komanda yoldaşlarının uğurunu davam etdirib. Milli üzvü Muhammad Ali Seferbekovdan (Rusiya) güclü olub – 3:2 (28:29, 29:28, 27:30, 30:27, 29:28). Aslanov 1/4 finalda Yaşua Fleminqlə (İngiltərə) üz-üzə gələcək.

Bununla da oğlan boksçuların yarışında 1/4 finala vəsiqə qazanan təmsilçilərimizin sayı 4-ə yüksəlib. Daha öncə Əli Əliyev (50 kq) də bu hüquqa yiyələnib.

Qeyd edək ki, bu gün qız boksçuların mübarizəsində 1 idmançımız 1/8, ikisi 1/4 final döyüşünə çıxacaq.