“Sabah” Basketbol Klubu heyətini amerikalı basketbolçu Çarlz Menniq Jr. ilə gücləndirib.

Prosport.Az xəbər verir ki, 1998-ci ildə Nyu-York ştatının Riverhed şəhərində anadan olan 196 sm boylu basketbolçu sürəti, atletizmi, xal toplamaq bacarığı və Avropa basketbolundakı təcrübəsi ilə seçilir.

Menninq kollec karyerasına Florida SouthWestern State College-də başlayıb. O, 2018/19 mövsümündə orta hesabla 16,8 xal, 4,8 ribaund və 3,1 asist göstəricisi ilə çıxış edib və NJCAA Third-Team All-American seçilib. Daha sonra LSU və South Alabama universitetlərində forma geyinib.

2022-ci ildə Avropaya köçən amerikalı basketbolçu karyerası ərzində Serbiyanın “Metalac Valyevo” və “FMP Belqrad”, Almaniyanın “EWE Baskets Oldenburg”, İtaliyanın “Napoli Basket”, Rusiyanın “Avtodor Saratov” və Türkiyənin “Karşıyaka” klublarında çıxış edib.

Menninq 2025/26 mövsümündə “Karşıyaka”nın heyətində Türkiyə Basketbol Super Liqasında 30 oyunda orta hesabla 13,6 xal, 3,1 ribaund və 2,9 asist toplayıb.

O, həmçinin Basketball Champions League-də “EWE Baskets Oldenburg”un heyətində 4 oyunda iştirak edib və orta hesabla 10,3 xal, 4,3 ribaund və 4 asist göstəricisinə imza atıb.