Avqustun 5-də 2027-ci ildə Azərbaycanda keçiriləcək FIFA U-20 Dünya Çempionatı ilə bağlı yaradılmış Təşkilat Komitəsinin iclası keçirilib.

Prosport.Az xəbər verir ki, ıclasda bildirilib ki, Azərbaycan Respublikası Prezidentinin 27 iyul 2026-cı il tarixli sərəncamına əsasən, 2026-cı ildə ölkəmizdə təşkil olunacaq FIFA U-15 Dünya Çempionatı və Festivalının təşkili məsələləri də həmin Təşkilat Komitəsinə həvalə edilib. Bu səbəbdən əvvəlcə oktyabrın 22-31-də keçiriləcək FIFA U-15 Dünya Çempionatı və Festivalına hazırlığın mövcud vəziyyəti müzakirə olunub.

Təşkilat Komitəsinin sədri, Baş nazirin müavini Samir Şərifov qeyd edib ki, dünya futbolu tarixində ilk dəfə keçiriləcək FIFA U-15 Dünya Çempionatı və Festivalının Azərbaycana həvalə olunması ölkəyə göstərilən yüksək etimadın göstəricisidir. Onun sözlərinə görə, yarışda 175-dən çox ölkənin hər biri 20 nəfərlik nümayəndə heyəti ilə təmsil olunacaq və tədbirin əsas məqsədi gənc futbol istedadlarının inkişafına beynəlxalq səviyyədə töhfə verməkdir.

İclas zamanı idman obyektlərinin yarışlara hazırlığı, tikinti və infrastruktur işlərinin gedişi, eləcə də digər təşkilati məsələlər nəzərdən keçirilib.

Daha sonra 2027-ci ildə Azərbaycan və Özbəkistanın birgə ev sahibliyi edəcəyi FIFA U-20 Dünya Çempionatına hazırlıq məsələləri müzakirə olunub. Qeyd edilib ki, turnirdə 24 milli komanda iştirak edəcək. Açılış və final oyunları da daxil olmaqla qarşılaşmaların keçiriləcəyi şəhərlərin müəyyənləşdirilməsi istiqamətində AFFA, FIFA və Özbəkistan Futbol Federasiyası arasında məsləhətləşmələr davam edir.

Sonda Prezidentin müvafiq sərəncamlarından irəli gələn tapşırıqların vaxtında və keyfiyyətlə yerinə yetirilməsi üçün aidiyyəti dövlət qurumlarına müvafiq göstərişlər verilib, həm FIFA U-15 Dünya Çempionatı və Festivalı, həm də FIFA U-20 Dünya Çempionatı üzrə qurumlararası koordinasiyanın gücləndirilməsi və təşkilati məsələlərin operativ həlli üçün konkret vəzifələr müəyyənləşdirilib.