Bakıda keçirilən 17 yaşadək güləşçilər arasında dünya çempionatı başa çatdı.
Prosport.Az 1 il əvvəl Yunanıstanın paytaxtı Afinada keçirilmiş analoji dünya çempionatında qeydə alınmış nəticə ilə ölkəmizdə təşkil olunanı müqayisə edib.
Azərbaycan 2025-ci ildə həmin yarışa 23 idmançı ilə yollanıb. Yunan-Roma güləşində Əli Nəzərov (60 kq) qızıl, Hikmət Haqverdiyev (51 kq) gümüş, Abdurrahman Hüseynli (45 kq) bürünc medal qazanmışdı. Sərbəst güləşçilərimizdən Hüseyn İsmayılov (65 kq) qızıl, Həsən Həsənov (60 kq), Səid Paşayev (92 kq) və Hakim Tağıyev (110 kq) bürünc medalı ölkəmizə gətirmişdi. Qız güləşində medal olmamışdı.
Bununla da Azərbaycan Afinanı 2 qızıl, 1 gümüş və 4 bürünc medalla tərk etmişdi. Nəticədə Azərbaycan yarışı 7-ci sırada başa vurmuşdu. Komanda şəklində yunan-Roma millimiz 100 xalla 5-ci, sərbəst güləş yığmamız isə 90 xalla 4-cü olmuş və kubok qazana bilməmişdi.
Bəs Bakıda keçirilən dünya çempionatında hansı nəticə qeydə alındı? Komandamız 29 idmançı ilə yarışa qatılmışdı. Bunlardan yunan-Roma və sərbəst güləş millilərimiz maksimum – 10 nəfərlik heyətlə mübarizə aparırdı.
Yunan-Roma güləşində Əli Cavadlı (45 kq), Abdurrahman Hüseynli (51 kq), İsfahan Həsənov (80 kq) gümüş, Ömər Salmanov (48 kq), Elmir Çərkəzov (60 kq), Orxan Həbibli (65 kq) bürünc medalla kifayətləndi. Bu nəticədən sonra Rafiq Hüseynovun böyük məşqçi olduğu millimiz 107 xalla gümüş kubok qazandı (Rusiya 127 xalla 1-ci, İran 96 xalla 3-cü oldu). Bu, 2014-cü ildən yeniyetmələrin dünya çempionatında 5-ci gümüş kubokumuzdur. Sonuncu dəfə 2023-cü ildə eyni uğuru təkrarlamışdıq.
Mariya Stadnikin baş məşqçisi olduğu qız güləşində isə yenə medal olmadı. Hacı Əliyev isə sərbəst güləşdə böyük məşqçi kimi ilk ciddi sınağından üzüağ ayrıla bilmədi. Dünya çempionatı öncəsi böyük məşqçi təyin edilən Hacı Əliyevin 10 idmançısından yalnız İbrahim Həsənov (51 kq) gümüş medalla kifayətləndi.
Sərbəst güləş millimiz 28 xalla yalnız 13-cü ola bildi. Statistika üçün qeyd edək ki, Rusiya 146 xalla 1-ci, İran 145 xalla 2-ci və Hindistan 123 xalla 3-cü oldu.
Qız millimiz isə 24 xalla 15-ci yeri tutdu. ABŞ 167 xalla 1-ci, Hindistan 132 xalla 2-ci və Yaponiya 126 xalla 3-cü oldu.
Göründüyü kimi, Azərbaycan bu il Bakıda keçiriləcək ilk mötəbər turnirindən yaxşı nəticə ilə çıxa bilmədi. Bakıda 1 qızıl medalın olmaması barədə isə ciddi-ciddi təhlillər aparılmalıdır.
Müqayisə üçün onu da qeyd edək ki, 2012-cü ildə Bakının ev sahibliyi etdiyi analoji dünya çempionatında yunan-Roma güləş millimiz qızıl kubok qazana bilmişdi.
Səbuhi Musa