Azərbaycanda keçirilən güləş üzrə U-17 dünya çempionatında ilk medalçımız bəlli olub.

Mükafatlandırma mərasimindən sonra bürünc medalın sahibi Ümid Salmanov Prosport.Az-a müsahibə verib.

– Üməd, qələbə qazandın, bürünc medal əldə etdin. Bunu gözləyirdin, yoxsa bundan da yaxşı çıxış edə bilərdin?

– Əslində mən bura qızıl medal üçün gəlmişdim. Hədəfim qızıl medal idi. Dünən yarımfinalda bəzi səhvlərə görə məğlub oldum. Məndən zəif rəqib idi, yarımfinalda məğlub olduğum rəqib. İnşallah, gələn il daha da çalışacağam, bu bürünc medalı qızıl medala çevirməyə çalışacağam.

– Görüş nisbətən zəif keçdi, sən qələbəni asanlıqla qazandın. Nə səbəbdən?

– Elə bil ki, mən bu medalı qaçırmamalı idim. Üçüncü yer uğrunda döşəyə tam hazır çıxmışdım. Ən azından üçüncü yeri tutum, medalsız qalmayım deyə. Şükür Allaha, üçüncü yeri qazandım. Medala sahib çıxdım.

– Rəqib məğlubiyyəti həzm etmirdi, səninlə də görüşmədi.

– O, idmanda olan şeylərdir. Normal şeydir.

– Səhv deyəndə nəyi nəzərdə tutursan? Nədə boşluq verdin?

– Parterdə "zadni" vəziyyətində qolumu açıq saxlamışdım. Bir anlıq boşaldım, qolum boşaldı. Rəqib də dartdı, atdı. Bir xal oldu. 2:1 hesabı ilə məğlub oldum.

– Üzündəki cizgilər bugünkü görüşün nəticəsidir, yoxsa dünənkinin?

– Xeyr, dünən də olub, bu gün də olub, bir az.