Azərbaycanın daha 2 yunan-Roma güləşçisi Bakıda təşkil olunan U-17 dünya çempionatında finala yüksəlib.

Prosport.Az xəbər verir ki, Əli Cavadlı (45 kq) yarımfinalda rəqibi tatamiyə çıxmadığı üçün birbaşa həlledici raunda vəsiqə qazanıb. Abdurrahman Hüseynli (51 kq) isə gürcüstanlı Saba Abaşidzeni 9:3 hesabı ilə üstələyərək, adını finala yazdırıb.

Yarımfinalda iranlı Amirreza Səid Təhməzspurmarzuniyə uduzan Elmir Çərkəzov (60 kq) 3-cü yer uğrunda mübarizə aparacaq.

Bu gün, həmçinin Azərbaycanın üç yunan-Roma güləşçisi medallar uğrunda yarışacaq. Ömər Salmanov (48 kq) və Orxan Həbibli (65 kq) bürünc, İsfahan Həsənov (80 kq) isə mundialın qızıl medalını qazanmaq üçün mübarizə aparacaqlar.

Qeyd edək ki, Milli Gimnastika Arenasında keçirilən dünya çempionatında 60-dan çox ölkədən 700-ə yaxın yeniyetmə güləşçi iştirak edir. Azərbaycanı yarışda 29 idmançı təmsil edir.