Bu il Bakıda daha bir dünya çempionatı keçiriləcək.

Prosport.Az-ın xəbərinə görə, 22-23 avqustda qazax güləşi üzrə dünya çempionatı Bakı İdman Sarayında baş tutacaq.

Bu yarışın beynəlxalq təşkilatçısı Dünya Güləş Birliyi (UWW) və daxili təşkilatçısı Azərbaycan Milli İdman Növləri Assosiasiyası (AMİNA) olacaq.

Xatırladaq ki, güləşin bu növü üzrə 2023-cü ilin dekabrın 11-də Avropa çempionatı Bakıda keçirilməli olsa da, həmin yarış sonradan təxirə salınmışdı. Sonra qazax güləşi üzrə III Avropa çempionatı 2024-cü ilin 27-28 yanvarında "Sərhədçi" İdman Mərkəzində baş tutmuşdu.

Həmin yarışda Azərbaycan idmançıları 8 qızıl,5 gümüş və 3 bürünc medala sahib olub. Bu nəticə ilə Azərbaycan yığma komandası ümumi hesabda 1-ci pillədə qərarlaşıb.

Qeyd edək ki, bu il Bakıda 27 avqustda U-17 çimərlik güləşi üzrə dünya çempionatı və 28-29 avqustda çimərlik güləşi üzrə dünya seriyası turniri də keçiriləcək. Bundan başqa, 21-28 avqustda qadın voleybolu üzrə Avropa çempionatının C qrupunun oyunları, 4-11 oktyabrda cüdo üzrə dünya çempionatı, 17-18 oktyabrda sumo üzrə (gənclər və böyüklər) dünya çempionatı, 22-31 oktyabrda U-15 futbol üzrə dünya çempionatı və festivala da Azərbaycan ev sahibliyi edəcək.