Bu gün 17 yaşadək (U-17) güləşçilər arasında dünya çempionatı Bakıda start götürəcək.
Prosport.Az yarış öncəsi turnir haqqında məlumatları təqdim edir.
Yarış avqustun 2-dək Milli Gimnastika Arenasında (MGA) keçiriləcək. MGA ilk dəfə güləşin dünya çempionatına ev sahibliyi edəcək.
Dünya çempionatında Azərbaycan 29 güləşçi ilə təmsil olunacaq. Bunlardan 10-u yunan-Roma, 10-u sərbəst və 9-u qız güləşçilərdir. Bu həmçinin müvafiq olaraq böyük məşqçilər – Rafiq Hüseynov, Hacı Əliyev və Mariya Stadnikin 11-17 mayda Bolqarıstanın Samokov şəhərində keçirilmiş Avropa çempionatından sonra ilk ciddi yarışı hesab olunur.
Yarış 32-ci dəfə keçiriləcək. İlk belə dünya çempionatı 1975-ci ildə Meksikanın Santo Dominqo şəhərində baş tutub. Onda yalnız sərbəst güləş yarışı təşkil olunub. Qızların yarışı ilk dəfə 1988-ci ildə Fransanın Dijon şəhərində keçirilib. 1976-1979, 1981, 1984-1986, 2000-2010 və 2020-ci illərdə bu yarış təşkil edilməyib.
Azərbaycan 14 il sonra bu yarışa 2-ci dəfə ev sahibliyi edir. 2012-ci ildə 19-cu dünya çempionatı məhz Bakıda keçirilib. Həmin vaxt Rusiya komandası sərbəst güləşdə, Azərbaycan yunan-Romada, Yaponiya isə qız güləşində dünya çempionu olub.
Ümumiyyətlə, Azərbaycanın indiyədək U-17 yaş kateqoriyasında sərbəst güləşdə 1 (1999), yunan-Roma güləşində 2 (2012, 2013) dünya çempionluğu var. Bundan başqa, komanda şəklində Azərbaycanın 2014-cü ildən sonra sərbəst güləşdə 3 bürünc (2017, 2018, 2022), yunan-Roma güləşində 4 gümüş (2014, 2019, 2022, 2023) və 1 bürünc kuboku (2024) var.
Ötən ilin 28 iyul – 3 avqust tarixlərində Yunanıstanın paytaxtı Afinada keçirilmiş analoji yarışda ABŞ sərbəst güləşdə, İran yunan-Roma güləşində və Hindistan qız güləşində 1-ci olub. Komandamız həmin yarışda 2 qızıl, 1 gümüş və 4 bürünc medal qazanmaqla ümumi turnir cədvəlində 7-ci yeri tutmuşdu. Fərdi kateqoriyalar üzrə sərbəst güləşdə 90 xalla 4-cü (bürünc kubok üçün 1 xal çatmamışdı), yunan-Roma güləşində 100 xalla Qırğızıstanla birgə 4-5-ci olmuşduq.
Bu dəfə Rusiya güləşçiləri ilk dəfə öz ölkələrinin adı ilə mübarizəyə qoşulacaq. Bu səbəbdən sərbəst və yunan-Roma güləşində ABŞ, İran, Rusiya milliləri, eləcə də meydan sahibi Azərbaycan arasında gərgin rəqabət gedəcək.
Yeri gəlmişkən, son dünya çempionatında Belarus əsilli ABŞ təmsilçisi Arseni Kikinov həm sərbəst, həm də yunan-Roma güləşində medal qazanan idmançı kimi tarixə düşmüşdü. 17 yaşlı idmançı sərbəst güləşdə 65 kq-da gümüş (finalda Hüseyn İsmayılova uduzmuşdu) və eyni çəkidə yunan-Roma güləşində bürünc medal qazanmışdı. İndi o, Bakıda hər iki kateqoriyada yarışıb, qızıl medal qazanmağa çalışacaq.
Onu da qeyd edək ki, bu dünya çempionatında 16 Ermənistan güləşçisi də mübarizə aparacaq. Bu, 2015-ci ildə Bakıda keçirilmiş I Avropa Oyunlarından sonra Ermənistan idmançılarının yarışacağı ilk turnir kimi tarixə düşəcək.
Yarış üçün 52 ölkədən 675 güləşçi qeydiyyatdan keçib. Bunlardan 242-si yunan-Roma, 242-si sərbəst və 191-i qız güləşçilərdir. Bu dünya çempionatı 2017-ci ildə Afinada keçirilmiş dünya çempionatındakı iştirakçı sayını keçməklə rekorda imza atıb. Belə ki, orada qız güləşçilərin sayı 186 nəfər olmuşdu.
27-29 iyulda yunan-Roma güləşi, 29-31 iyulda qadın güləşi, 31 iyul – 2 avqustda sərbəst güləş yarışları keçiriləcək. 2 avqust istisna olmaqla, hər gün saat 10:30-da təsnifat görüşləri başlayacaq. Bu gün turnirin rəsmi açılış mərasimi saat 17:10-da keçiriləcək. Final görüşləri 17:00-20:00-da baş tutacaq. Yalnız avqustun 2-də sərbəst güləşin final görüşləri səhər saatlarında başlayıb, günorta saatlarında yekunlaşacaq.
Səbuhi Musa
