Azərbaycan Güləş Federasiyası (AGF) ilə ABŞ-də fəaliyyət göstərən "Sülh naminə Güləş" İctimai Birliyi arasında əməkdaşlığa dair memorandum imzalanıb.

Prosport.Az xəbər verir ki, Milli Gimnastika Arenasında keçirilən tədbirdə hər iki qurumun rəsmiləri, qonaqlar və digər nümayəndələr iştirak edib.

Tədbir çərçivəsində "Sülh naminə Güləş" təşkilatının icraçı direktoru Dan Rasl Azərbaycan Güləş Federasiyasının baş katibi Pərvin Piriyevlə görüşərək əməkdaşlığa görə təşəkkürünü ifadə edib.

Daha sonra ABŞ və Azərbaycan komandalarının üzvləri arasında hədiyyə mübadiləsi aparılıb. ABŞ millisinin güləşçiləri "Zəfər" Güləş Klubunun uşaqlarına imzalı posterlər təqdim edib. ABŞ-nin Azərbaycandakı səfirliyinin ictimai diplomatiya üzrə müşaviri Maykl Haket isə ABŞ və Azərbaycanın U-17 milli komandalarına, eləcə də "Zəfər" Güləş Klubunun üzvlərinə hər iki ölkənin bayraqlarının nişanlarını hədiyyə edib.

Tədbirin sonunda Azərbaycan Güləş Federasiyası ilə "Sülh naminə Güləş" arasında əməkdaşlıq memorandumu imzalanıb.

Daha sonra mətbuat nümayəndələrinin sualları cavablandırılıb.

Qeyd edək ki, U-17 dünya çempionatı iyulun 27-dən avqustun 2-dək Bakıda, Milli Gimnastika Arenasında keçiriləcək. Yarışda 60-dan çox ölkədən 700-ə yaxın yeniyetmə güləşçinin iştirakı gözlənilir.