Xəbər verdiyimiz kimi, Azərbaycan Həndbol Federasiyasında vəziyyət ürəkaçan deyil. İdmançıların maaşları ödənilmir, məşq meydançaları yoxdur. İdmançılar Gənclər və İdman Nazirliyinin qarşısına toplaşaraq problemin həllini tələb edirlər.

Məsələ ilə bağlı yeniyetmələrdən ibarət yığma komandanın baş məşqçisi Rəşad Hüseynov Prosport.Az-a açıqlama verib.

"Bu gün burada toplaşmağımızın məqsədi etirazımızı bildirməkdir. Aylardır ki, maaşlarımız verilmir və bu təkcə məşqçilərə deyil, idmançılara da ciddi təsir göstərir. Maddi çətinliklər ucbatından bəzi idmançılar idmandan uzaqlaşmağa, başqa sahələrdə işləməyə məcbur olur. Komandamızda ailəli idmançılar da var və onların vəziyyəti daha ağırdır.

Dəfələrlə müraciət etmişik. Gənclər və İdman Nazirliyindən bizə bildirirlər ki, məsələ onların səlahiyyətində deyil. Yeni mövsümün başlamasına az vaxt qalıb, amma nə hazırlıq keçmək üçün şəraitimiz var, nə də məşq edəcəyimiz zal. Federasiya icarə haqqını ödəyə bilmədiyi üçün məşq bazamızı da itirmişik. İstəyimiz odur ki, bu problem qısa zamanda həll olunsun və Azərbaycan həndbolu daha da geriyə getməsin".

Bahar Rüstəm