Bakı Futbol Federasiyasının (BFF) təşkilatçılığı ilə həyata keçirilən “Sabahın Ulduzları” layihəsi çərçivəsində məlumatlandırma sessiyası və imza mərasimi təşkil olunub.
Prosport.Az xəbər verir ki, tədbir Dövlət Himninin səsləndirilməsi ilə başlayıb, ardınca Ümummilli Lider Heydər Əliyevin və Vətən uğrunda canından keçən şəhidlərin xatirəsi bir dəqiqəlik sükutla yad edilib.
Daha sonra turnirlə bağlı videoçarx nümayiş etdirilib.
Bakı Futbol Federasiyasının (BFF) prezidenti Tahir Süleymanov təşkilatçılığa görə hər kəsə təşəkkür edib: "Bu gün biz burada Azərbaycan uşaq futbolunun yeni təməlini qoyuruq. Bu idman növünün gələcəyi üçün bir olmalıyıq və daha yaxşı futbolçular yetişdirməliyik".
AFFA-nın baş katibi Cahangir Fərəcullayev turnirin Azərbaycan futbolunun inkişafı üçün vacib olduğunu bildirib: "Federasiya olaraq məqsədimiz uşaq futbolunu inkişaf etdirməkdir. Bu il 30 min uşağın iştirakı ilə "Məktəbli Kuboku" keçirdik. Uşaqlar iki yaş kateqoriyasında mübarizə apardılar. Sevindirici haldır ki, finalda bölgə kollektivləri var idi. Bildiyiniz kimi, bu il Azərbaycan ilk dəfə keçiriləcək FIFA U-15 dünya çempionatına və Futbol Festivalına ev sahibliyi edəcək. "Sabahın ulduzları" turniri də milli komanda üçün yaxşı seçim mənbəyi olacaq. Əminəm ki, qarşıdakı illərdə bunun bəhrəsini görəcəyik".
Azərbaycan millisinin baş məşqçisi Ayxan Abbasov vaxtilə bu turniri yaxından izlədiyini söyləyib: "Uşaq futbolu bizim yaralı yerimizdir. Cahangir Fərəcullayevlə milli barədə söhbət edərkən 15 dəqiqə sonra uşaq futboluna keçirik. Bu məsələdə klublar önə çıxmalıdır. Deyirlər ki, AFFA futbolçu yetişdirməlidir. Bu fikir düzgün deyil. Mütəxəssislər xaricə klubların akademiyalarına yollanmalıdırlar. Düzdür, bunu üçün maliyyə də önəmlidir. Milliyə oyunçu seçməkdə çətinlik çəkirik. Ona görə də “Sabahın Ulduzları” kimi yarışların bölgələrdə təşkili daha faydalı olar".
AFFA-nın texniki direktoru Edmond Klaus isə deyib ki, inkişaf üçün çox iş görmək lazımdır: “Uğur istəyiriksə, bir olmalıyıq. Hər kəs qısa zamanda uğur əldə etmək istəyir. Amma futbolda bu mümkün deyil. AFFA-nın uşaq futbolu ilə bağlı layihələri var. Bunu davam etdirmək lazımdır. "Sabahın Ulduzları" adı mənə xoş gəlir. Vaxtilə "Qəbələ" Futbol Klubu buna uyğun beynəlxalq yarış təşkil edirdi. Təəssüf ki, hazırda bu turnir keçirilmir. Uşaq futbolunun inkişafı üçün klublar da müəyyən işlər aparmalıdır. Azərbaycan müxtəlif beynəlxalq yarışlara ev sahibliyi edir. Ölkəniz diqqət mərkəzindədir Elə şərait yaratmalıyıq ki, futbolçular potensialından daha çoxunu ortaya qoya bilsinlər”.
Sonda BFF ilə turnirin sponsoru ALPEX arasında imza mərasimi baş tutub.