Bu mövsüm FIBA Avropa Kubokunun təsnifat mərhələsində mübarizə aparacaq “Neftçi” basketbol komandasının rəqibi müəyyənləşib.

Prosport.Az xəbər verir ki, bu gün Almaniyanın Münxen şəhərində təşkil olunan püşkün nəticəsinə əsasən, komandamız özü kimi Estoniyanın 4-cüsü “Transkom" (Pərnu) klubu ilə qarşılaşacaq.

Bu oyunlar 23 və 30 sentyabrda ev-səfər prinsipi ilə keçiriləcək. Təmsilçimiz bu mərhələni keçəcəyi təqdirdə, H qrupunda yer alacaq və mübarizəni FIBA Avropa Kubokunun qrup mərhələsində (müntəzəm mövsüm) davam etdirəcək.

H qrupunda potensial rəqiblər Bolqarıstanın “Lokomotiv” (Plovdiv), Rumıniyanın “Rayffayzen”, İsveçrənin “Fribur Olimpik”, Latviyanın “VEF Riqa” və Yunanıstanın “Maykonos” komandalarıdır.

Qeyd edək ki, püşkatma mərasimində “Neftçi” İdman Klubunu qurumun icraçı direktoru Fərəc Əliyev və İdmanın inkişafı departamentinin rəisi Emil Kərimov təmsil edib. Onlar püşkatma mərasimi çərçivəsində FIBA-nın Avropa üzrə icraçı direktoru Kamil Novak və qurumun digər rəsmiləri ilə görüşlər keçirib.