Şimali Makedoniyanın paytaxtı Skopyedə keçirilən güləş üzrə U20 Avropa çempionatına yekun vurulub.

Prosport.Ax xəbər verir ki, yarışın son günündə 61, 74, 86, 92 və 125 kq çəki dərəcələrində sərbəst güləşçilər arasında medalçılar müəyyənləşib.

Azərbaycan millisinin üzvlərindən Camal Abbasov (61 kq) finalda rusiyalı Usman İndirbayevə 2:13, Nurlan Ağazadə (74 kq) isə həlledici görüşdə almaniyalı Manuel Vaqinə 2:4 hesabı ilə məğlub olaraq gümüş medala sahib çıxıblar.

Məhəmməd Abbaszadə (86 kq) bürünc medal uğrunda qarşılaşmada israilli Tomer Drojnyakı 7:1 hesabı ilə məğlub edərək fəxri kürsünün üçüncü pilləsinə yüksəlib. Hüseyn Məmmədtağızadə (92 kq) isə bürünc medal görüşündə gürcüstanlı Sandro Kuraşviliyə 1:12 hesabı ilə uduzub.

Çempionatın son qarşılaşmasında Yusif Dursunov (125 kq) rusiyalı Soslan Qabuyevlə finalda üz-üzə gəlib. Gərgin keçən görüşdə 0:3 hesabı ilə geridə olmasına baxmayaraq, əzmkarlıq göstərən Azərbaycan güləşçisi möhtəşəm geridönüş edərək 4:3 hesablı qələbə qazanıb və U20 Avropa çempionu adına layiq görülüb.