"İlk növbədə Azərbaycanın 4 klubunun avrokuboklarda təmsil olunmasına görə çox sevindiyimi bildirmək istəyirəm. Bütün komandalarımıza uğurlar arzulayıram".

Prosport.Az xəbər verir ki, bu sözləri "Landau Layns" klubunun baş məşqçisi Ərhan Tokər FIBA Çempionlar Liqasının püşkatmasını dəyərləndirərkən deyib.

Türkiyəli mütəxəssis təsnifat mərhələsində “Riqa” ilə keçirəcəkləri oyunlardan danışıb: "Çempionlar Liqasındakı ilk oyunumuz "Riqa"ya qarşı olacaq. Bu turnirdə əsas qrup mərhələsinə vəsiqə qazanmağın çox çətin olduğunu bilirik. Buna baxmayaraq, əlimizdən gələnin ən yaxşısını etməyə çalışacağıq. Hədəfimiz ardıcıl qələbələr qazanaraq 16 komanda arasında 1-ci yeri tutmaq və turnirdə Azərbaycanı layiqincə təmsil etməkdir. Əgər bunu bacarmasaq, mübarizəmizi FIBA Avropa Kubokunda davam etdirəcəyik.

"Riqa" ötən mövsüm qarşılaşdığımız "Trefl Sopot" və "Kalev" kimi Avropa turnirlərinin daimi iştirakçılarındandır. Onlar sərt və fiziki basketbol oynayan komandadır".

O, hazırda heyəti formalaşdırdıqlarını və transfer işlərinin hələ yekunlaşmadığını vurğulayıb: "Böyük ehtimalla, rəqib də eyni prosesdədir. Onların əvvəlki oyunlarına əsasən müəyyən qiymətləndirmələr aparmaq mümkündür. Ancaq indiki mərhələdə konkret fikir söyləmək asan deyil. Düşünürəm ki, həm bizim, həm də rəqibin yekun heyəti müəyyənləşdikdən sonra daha dolğun dəyərləndirmə aparmaq mümkün olacaq".