Azərbaycan basketbolu ilk dəfə 4 komanda ilə avrokuboklarda təmsil olunacaq.

Prosport.Az-ın xəbərinə görə, 2026/27 mövsümü Azərbaycan basketbolu üçün ilklərlə yadda qalacaq.

Əvvəla, ona görə ki ilk dəfə Azərbaycan avrokuboklarda 4 komanda ilə təmsil olunacaq. Ötən mövsüm 3 komanda ilə təmsil olunmuşduqsa, bu dəfə say 4-dür. Bunlar ölkə çempionu "Sabah", finalçı "Landau Layns" (əvvəlki "Abşeron Layns"), Azərbaycan Kubokunun qalibi və çempionatın 3-cüsü "Gəncə" və 4-cü yeri tutmuş "Neftçi"dir.

İlk dəfə FIBA Çempionlar Liqasında 1 yox, 2 komandamız iştirak edəcək. "Sabah" Çempionlar Liqasının müntəzəm mövsümündə, "Landau Layns" isə təsnifat mərhələsində mübarizə aparacaq.

Daha bir ilk ondan ibarətdir ki, ilk dəfə bölgə komandamız avrokuboklarda debüt edəcək. Belə ki, "Gəncə" Azərbaycan Kubokunun qalibi kimi rəqiblərini Gəncə İdman Sarayında qəbul edəcək. Böyük ehtimalla, "Gəncə" FIBA Avropa Kubokunun qrup mərhələsində, ardıcıl 2-ci dəfə avrokuboklara qatılan "Neftçi" isə həmin turnirin təsnifat mərhələsindən mübarizəyə qatılacaq. Bu məsələ bu günlərdə FIBA tərəfindən təsdiqlənəcək.  

Qeyd edək ki, Çempionlar Liqasında təsnifat mərhələsinin püşkü iyulun 8-də İsveçrənin Mi şəhərində atılacaq. 14-20 sentyabrda isə təsnifat mərhələsindən müntəzəm mövsümə vəsiqə qazanmaq üçün oyunlar keçiriləcək. İlk dəfə 48 komandanın (8 qrupun hər birində 6 komanda) iştirak edəcəyi Avropa Kubokunun püşkü isə iyulun 16-da Almaniyanın Münxen şəhərində atılacaq.