Kişi basketbol millimizin 2029-cu ildə keçiriləcək Avropa çempionatının seçmə mərhələsinin ilk raundundakı rəqibi İrlandiya yığması Ermənistana uduzub.

Prosport.Az-ın xəbərinə görə, Maykl Brinin yetirmələri ABŞ-nin Los-Anceles şəhərində yerləşən Kaliforniya Dövlət Universitetinin zalında keçirilmiş matçda qonşu yığmaya 59:74 hesabı ilə məğlub olub.

Matç Ermənistan diasporunun təşkilatçılığı ilə Los-Anceles Basketbol Kuboku turniri çərçivəsində baş tutub. İrlandiya bu heyətlə Los-Ancelesdə meydana çıxıb:

Maks Amadasun ("Kultural i Deportiva Leonesa", İspaniya), Rapolas Buyvidas ("Belfast Star", Şimali İrlandiya), Şon Flud ("Herouz Den Bosx", Niderland), Şon Fitspatrik ("Marian"), Sem Alaciki ("Corcio Tezi Qrup Pistona", İtaliya), Deklan Qbiniqi ("Titans"), Ayvaras Uosis ("Karsen Nyuman Universiteti", ABŞ), Ben Stivens ("Alyans", Kanada), Adrian OSulivan ("Balinkoliq"), Tyenan Stayns ("Kvinsi Universiteti", ABŞ), Liroy Odiahi ("Qərbi Kentukki", ABŞ), Viktor Okocie ("YuMass Louell", ABŞ).  

Qeyd edək ki, İrlandiya millisi Avropa çempionatının seçmə mərhələsi çərçivəsində iyulun 2-də Skopyedə Şimali Makedoniyanın, həmin ayın 5-də isə Bakıda yığmamızın qonağı olacaq. Ölkəmizdəki görüş Bakı İdman Sarayında keçiriləcək. Matç saat 17:00-da başlayacaq. Bunadək millimiz isə iyulun 2-də Lüksemburqun qonağı olacaq.

Xatırladaq ki, Tahir Baxşıyevin baş məşqçisi olduğu millimiz fevralda İrlandiyaya Dublində 76:75 hesabı ilə qaliib gəlib. Millimiz və İrlandiya A qrupunda 5 xalla 3-4-cü sıranı bölüşür.