3x3 basketbol üzrə Dünya Qadın Seriyasında Sumqayıt mərhələsinin ilk oyun gününün qarşılaşmaları keçirilib.

Prosport.Az xəbər verir ki, Azərbaycanı turnirdə təmsil edən "Neftçi SOCAR" uğurlu çıxışı ilə diqqət çəkib.

Millimizin üzvləri – Arika Karter, Aleksandra Mollenhauer, eləcə də yaponiyalı Aoi Katsura və serbiyalı Nevena Vuçkoviçdən ibarət Bakı təmsilçisi qrup mərhələsində keçirdiyi hər 2 oyunda qələbə qazanaraq 1/4 finala vəsiqə əldə edib. “Neftçi SOCAR” ilk görüşdə Çinin “Yancing” klubunu 21:18 hesabı ilə məğlub edib. Komanda 2-ci matçda isə Çin millisindən üstün olub – 15:13.

Beləliklə, qrupunu lider kimi başa vuran “Neftçi” birbaşa 1/4 final mərhələsinə yüksəlib. Komanda növbəti mərhələdə C qrupunun 2-cisi olmuş Yaponiya ilə qarşılaşacaq. Matç sabah saat 16:00-da başlayacaq.

Qeyd edək ki, qadınlardan ibarət Azərbaycan millisi isə Sumqayıt mərhələsində mübarizəni təsnifat oyunlarından sonra dayandırıb. Şilan Akbingöl, Ləman İbrahimova, Səlminaz Ramazanlı və Adilə Yusubovadan ibarət komandamız Tailanda 6:21 və Litvaya 4:21 uduzub.

Xatırladaq ki, "Neftçi SOCAR" iyunun 17-də Fransanın Orlean şəhərində keçirilmiş mərhələnin qalibi olub.