Türkiyə millisinin baş məşqçisi Vinçentso Montella futbolçularından başlarını dik tutmalarını istəyib.

Prosport.Az xəbər verir ki, bunu italiyalı mütəxəssis DÇ-2026-nın qrup mərhələsində Paraqvaya qarşı keçirilən oyundan sonra deyib.

O, məğlubiyyətin acı olduğunu söyləyib: "Çox məyusam. Türk millətinin böyük gözləntiləri var idi. Bizim də gözləntilərimiz çox böyük idi. Türkiyə Futbol Federasiyası adından da çox üzgünəm, onların necə çalışdıqlarını bilirəm. Futbolçuların necə əziyyət çəkdiklərini də bilirəm. 35 ildir ki, futbolun içindəyəm. Belə hal adətən 50 ildə bir dəfə baş verər, amma bizim başımıza cəmi 2 oyunda gəldi. 2 matçda qapıya 65 zərbə vurduq. Topa sahibolma faizindən isə heç danışmıram. Bəxt bu dəfə bizim tərəfimizdə deyildi. Futbolçularımıza dedim ki, başınızı dik tutun. Bəzən deyirlər ki, qismətdən o yana yol yoxdur".

O, sözlərinə belə davam edib: "Mən həmişə futbolçularımızın nə qədər çalışqan və istəkli olduqlarına baxıram. Meydandakı ruhlarına və mübarizə əzmlərinə diqqət yetirirəm. Hamısında inanılmaz bir istək və həvəs var idi. Hər 2 oyunda sonadək mübarizə apardılar. Mən onlara hər zaman dəstək olacağam. Heç kim məsuliyyətdən yayınmadı, hər kəs əlindən gələni etdi və mübarizə apardı. Təəssüf ki, bu dəfə alınmadı".

Qeyd edək ki, Türkiyə seçməsi D qrupundakı 2-ci matçında Paraqvaya 0:1 hesabı ilə uduzub. Bu nəticədən sonra "ay-ulduzlular"ın növbəti mərhələyə yüksəlməyəcəyi dəqiqləşib.