Aleksey Kaşşuk tezliklə "Qarabağ"ı tərk edə bilər.

Prosport.Az sportinfo.az-a istinadən xəbər verir ki, ukraynalı legionerə özünə yeni komanda tapmaq icazəsi verilib. 26 yaşlı vingerin həm özüylə, həm də meneceriylə bu yöndə hərtərəfli söhbət edilib.

Bildirilib ki, onun xidmətinə maraq göstərən real müştəri olarsa, danışıqlar aparmağa hazırdırlar. Hətta "köhlən atlar" maliyyə şərtlərində qarşı tərəfə müəyyən güzəştlər etməyə hazırdır.

“Şaxtyor”un (Donetsk) yetirməsi 2019-2022-ci illərdə icarə əsasında ölkəsində “Mariupol”un, 2022-2023-cü il mövsümündə isə Azərbaycanda “Sabah”ın formasını geyinib.

Ukraynanın aşağı yaş qrupu üzrə bütün yığmalarında çıxış etmiş yarımmüdafiəçi 2019-cu ildə 20 yaşadək futbolçulardan ibarət millilər arasında keçirilən dünya çempionatının qalibi olub.

2024-cü ilin sentyabrın 4-də Ağdam təmsilçisi ilə 3 illik müqavilə imzalamış Kaşşuk ötən müddətdə özünü yaxşı tərəfdən göstərə bilməyib.

Qeyd edək ki, "Qarabağ" bu yay artıq 4 nəfərlə vidalaşıb. Toral Bayramov, Emmanuel Addai, Ramil Şeydayev və Sami Mmae düşərgəni tərk edib.