DÇ-2026-nın ən çox müzakirə olunan yeniliklərindən biri matç ərzində 2 dəfə tətbiq olunan su fasilələridir. Amerika idmanında adi hal sayılan bu yenilik Avropa futbol məktəbinin nümayəndəsi olan məşqçilərin narazılığına səbəb olub.

Prosport.Az xəbər verir ki, İsveç millisinin baş məşqçisi Qrem Potter bu fasilələrin oyunun gedişinə təsir göstərə biləcəyini deyir:

“Artıq demək olar ki, bu fasilələr oyunun dinamikasını dəyişir. Çünki matç iki hissə yox, sanki dörd hissə şəklində oynanılır. Bu, aydın məsələdir. Amma üstünlüyə malik olan komanda fasilədən sonra həmin üstünlüyü itirə bilər. Şikayət etmirəm. Qayda budursa, buna uyğunlaşmalıyıq”.

ABŞ millisinin baş məşqçisi Maurisio Poçettino da bu yeniliyi bəyənmədiyini gizlətməyib: "Bu, mənim xoşuma gəlmir. Belə fasilələri yalnız hava şəraiti həqiqətən ekstremal olanda dəstəkləyirəm. Hava normaldırsa, buna ehtiyac yoxdur".

Lakin su fasiləsi ilə bağlı şok iddialar da var. Bəzi xəbərlərə görə, su fasilələrinin əsas məqsədi futbolçuların istirahəti deyil, reklam yayımı üçün əlavə vaxt yaratmaqdır. Jurnalist Romen Molinanın məlumatına görə, mundialın Meksika – Cənubi Afrika Respublikası (2:0) matçında hakim futbolçuların oyuna qayıtmasını bir qədər gecikdirib, çünki televiziyada reklam bloku hələ başa çatmayıb. Bu isə fasilələrin hava şəraitindən daha çox kommersiya məqsədlərinə xidmət etdiyi barədə fikirləri gücləndirib.