Daha bir ukraynalı mütəxəssis Azərbaycanda çalışa bilər.

Prosport.Az sport.ua saytına istinadən xəbər verir ki, Vladislav Lupaşkonun ölkəmizdə fəaliyyət göstərməsi istisna deyil. 39 yaşlı məşqçi yerli mətbuata açıqlamasında məlumatı təsdiqləyib. O, konkret olaraq Azərbaycan və Qazaxıstan klublarından təklif aldığını bildirib.

Lupaşko hətta müəyyən danışıqların aparıldığını, lakin hələlik heç kimlə anlaşmadığını söyləyib: “Mənim üçün əsas məsələ sadəcə yeni iş tapmaq deyil, inkişaf imkanı verən və perspektivli layihəyə qoşulmaqdır. Buna görə də təklifləri dəyərləndirərkən klubun məqsədlərinə və gələcək planlarına diqqət yetirirəm”.

Qeyd edək ki, Vladislav Lupaşko son klubu olan “Karpatı”dan ötən ilin dekabrında ayrılıb və işsizdir. Hazırda baş məşqçi postu boş olan 3 klubumuz var – “Sumqayıt”, “Kəpəz” və “Aarz-Naxçıvan”.