DÇ-2026-da iştirak edən Seneqal millisi turnir zamanı formasında dəyişiklik etmək məcburiyyətində qalıb.

Prosport.Az xəbər verir ki, bu barədə jurnalist Mayki Junior sosial şəbəkə hesabında məlumat yayıb. FİFA-nın tələbi əsasında Afrika təmsilçisi emblemin üzərində yer alan ulduzu formadan götürüb. Buna səbəb qurumun qaydalarına əsasən, milli komandaların formalarındakı ulduzların yalnız dünya çempionatında qazanılmış titulları ifadə etməsidir.

Seneqal 2021-ci ildə Afrika Millətlər Kubokunun qalibi olduqdan sonra formasına bir ulduz əlavə etmişdi. Lakin bu göstərici mundial qalibiyyətini əks etdirmədiyindən FİFA tərəfindən qəbul edilməyib.

Bildirilib ki, oxşar tələb Misir millisinə də tətbiq olunub və komanda formalarındakı ulduzları çıxarmağa məcbur qalıb.

Qeyd edək ki, ABŞ, Kanada və Meksikanın birgə ev sahibliyi etdiyi DÇ-2026 iyunun 11-də başlayıb. Seneqal qrup mərhələsində Fransa, Norveç və İraq milliləri ilə mübarizə aparır.