Polşa mətbuatı Çempionlar Liqasının ikinci təsnifat mərhələsində “Lex” (Poznan) klubunun potensial rəqiblərini dəyərləndirərkən Azərbaycan təmsilçisi “Sabah”ı da ən çətin variantlardan biri kimi göstərib.

Prosport.Az xəbər verir ki, kkslech.com portalında dərc olunan yazıda Bakı klubunun son dövrlərdəki uğurlarına diqqət çəkilib. Nəşr bildirib ki, “Sabah” heyətində polşalı futbolçu Timoteuş Puxaçı da saxlayır və bu komanda son mövsümdə ölkənin aparıcı klublarından olan “Qarabağ”ı geridə qoyaraq uğurlu çıxış edib.

Məqalədə qeyd olunub ki, komandaya vaxtilə “Hayduk”, “Omoniya” və “Ludoqorets” kimi klubları çalışdırmış litvalı mütəxəssis Valdas Dambrauskas rəhbərlik edir. Həmçinin “Piast”ın sabiq futbolçusu Akim Zedadka da heyətin diqqət çəkən isimlərindən biri kimi göstərilib.

Polşalı jurnalistlər “Lex” üçün Bakıya səfərin uzun və yorucu olacağını, səfərin logistika baxımından əlavə çətinliklər yaradacağını vurğulayıblar. Onların fikrincə, belə bir eşləşmə hətta Polşa çempionatında “Veçista” ilə oyunun təxirə salınmasına da səbəb ola bilər.

Qeyd edək ki, Çempionlar Liqasında birinci təsnifat mərhələsinin püşkü iyunun 16-da, ikinci təsnifat mərhələsinin püşkü isə iyunun 17-də atılacaq. Polşa çempionu “Lex” mübarizəyə ikinci təsnifat mərhələsindən qoşulacaq.