Gənclər və İdman Nazirliyi ilə Azərbaycan Atletika Federasiyasının birgə təşkil etdiyi Azərbaycan çempionatı başa çatıb.

Prosport.Az xəbər verir ki, yarışın son günü Azərbaycan atletikasının tanınmış simalarından olan Nazim Babayevin böyük idmanla vidalaşması ilə əlamətdar olub. 28 yaşlı üç təkanla tullanan atlet peşəkar karyerasının son yarışına çıxıb.

Nazim Babayev 2019-cu ildə Qlazqoda keçirilən qapalı məkanlarda Avropa çempionatında qızıl medal qazanaraq Azərbaycan atletikası tarixinə adını yazdırıb. O, həmçinin ikiqat Yay Universiadası və İslam Həmrəyliyi Oyunlarının çempionudur. Atlet müxtəlif yaş qruplarında beynəlxalq arenada çoxsaylı uğurlara imza atıb.

Azərbaycan Atletika Federasiyası yayımladığı açıqlamada Nazim Babayevə ölkə idmanına verdiyi töhfələrə görə təşəkkür edib və gələcək fəaliyyətində uğurlar arzulayıb.

Çempionatın son günündə 200 metr məsafəyə qaçışda Novruz Əsədli və Səlma Ağabəyova, 800 metrdə Loğman İsrafilli və Gülçin Nağıyeva, 5000 metrdə isə Əmrah Nağıyev və Natalya Vallek qızıl medal qazanıblar.

Uzunluğa tullanmada Cabir Əliyev və Sofiya İsrafilova, lövhə atmada İsmayıl Əliyev və Lalə Cəniyeva birinci olublar. Çəkic atma növündə isə Rəhimə Bəylərova çempionluq sevinci yaşayıb.