"Neftçi"nin qapıçısı Kenan Piriç FIFA-da "Antalyaspor"a qarşı açdığı işi qazanıb.

Prosport.Az sport24.az-a istinadən xəbər verir ki, FIFA-nın Mübahisələrin Həlli Palatası Bosniya və Herseqovinadan olan oyunçunun Türkiyə təmsilçisi ilə bağlı şikayətini təmin edib.

Mübahisə Piriçin "Antalyaspor"da çıxış etdiyi dövrə təsadüf edir. Qolkiper klubun müqavilə üzrə öhdəliklərini yerinə yetirmədiyini, əməkhaqlarının vaxtında ödənilmədiyini əsas gətirərək FIFA-ya müraciət etmişdi.

İşə baxan qurum müəyyən edib ki, "Antalyaspor" uzun müddət futbolçunun maaşlarını gecikdirib. Qapıçının dəfələrlə xəbərdarlıq etməsinə baxmayaraq, borclar tam şəkildə aradan qaldırılmayıb. Nəticədə FIFA Piriçin müqaviləyə haqlı səbəbdən xitam verdiyi qənaətinə gəlib.

Qərara əsasən, "Antalyaspor" Kenan Piriçə 83 min avro məbləğində gecikdirilmiş əməkhaqqı, həmçinin müqavilənin əsassız pozulmasına görə 514 min avro təzminat ödəməlidir. Bundan əlavə, hər iki məbləğə illik 5 faiz faiz hesablanacaq.

Beləliklə, Türkiyə klubu bosniyalı qolkiperə ümumilikdə 597 min avrodan artıq vəsait verməlidir. Əks təqdirdə klub transfer qadağası ilə üzləşəcək.