"Əfsuslar olsun ki, aldığım ağır zədələr karyeramı erkən bitirməyimə səbəb oldu".

Bu sözləri Prosport.Az-a açıqlamasında U-15 milli komandasının məşqçisi təyin olunan veteran sərbəst güləşçi Əliabbas Rzazadə deyib.

O, güləşdən bu cür ayrılmaq istəmədiyini bildirib: "Döşəyə qayıtmağı çox istəyirdim, zədələrimin sağalması üçün mübarizə aparırdım. Amma təəssüf ki, mümkün olmadı. Karyeramı başa vurduğuma görə məyus olsam da, U-15 yığma komandasına məşqçi təyin edilməyim mənə yenidən ruh yüksəkliyi qazandırdı".

Rzazadə bundan sonra təcrübələrini yeniyetmə güləşçilərlə bölüşəcəyini vurğulayıb: "Onları düzgün istiqamətləndirəcəyəm. Uğurları üçün əlimdən gələni edəcəyəm. Məşqçilər heyəti olaraq tək məqsədimiz bayrağımızı yüksəldib, himnimizi səsləndirməkdir. Üzərimizə düşən öhdəlik güləşin ölkə tarixində öndə gedən idman növlərindən biri olduğunu aşılamaq, inkişafı üçün isə durmadan çalışmaqdır".

Qeyd edək ki, 28 yaşlı Əliabbas Rzazadə 2021-ci ildə U-23 dünya çempionu olub, 2023-cü ildə isə böyüklərin Avropa çempionatında qızıl medal qazanıb. O, bu ilin yanvarında keçirilmiş sonuncu Azərbaycan çempionatında 61 kq çəki dərəcəsində bürünc medal əldə etmişdi.