"Turan Tovuz"un yarmmüdafiəçisi Ayxan Hüseynova Türkiyədən rəsmi təklif gəlib.

Prosport.Az sportinfo.az-a istinadən xəbər verir ki, "Vanspor" millimizin üzvünə"elçi düşüb". Təklif olunan müqaviləni müddəti 2 illikdir. Hüseynovun Türkiyəyə yollanmaq ehtimalı indi daha yüksəkdir, nəinki Almaniyaya getməsi.

Çünki onun "Darmştadt"a keçidində durğunluq yaranıb. II Bundesliqa klubu Ayxana 2+1 illik müqavilə təklif edib, amma maliyyə baxımından irəli sürülən şərtləri dəyişmək istəmirlər. Bundesliqaya vəsiqə qazana bilməyən "Darmştadt" digər oyunçularla müqayisədə həmyerlimizə kifayət qədər aşağı məbləğ ödəmək niyyətindədir.

Odur ki, tərəflər arasında danışıqlar bir qədər dalana dirənib. Hüseynov onlardan, onlar da Hüseynovdan yekun cavab gözləyir. Yaxın 1-2 həftə ərzində məsələyə nöqtə qoyulmalıdır. Almanlar maaşda artım etməsələr, Ayxan Türkiyə və Asiyadan olan təkliflərini dəyərləndirəcək.

Hələ növbədə Premyer Liqa təmsilçiləri də var. "Turan Tovuz" 4 ildir xidmətindən yararlandığı 26 yaşlı oyunçunu düşərgədə saxlamağa maraqlıdır, həmçinin digər iddialılar elçi daşının üzərində əyləşib.

Ayxan Hüseynov "Vanspor"a getsə, bu liqadakı soydaşlarımızın sayı 2-yə çatacaq. Yaxınlarda Toral Bayramov da "Qarabağ"ı "Bursasror"a dəyişib və 2 illik müqaviləyə qol çəkib.