Parakarate üzrə Avropa ,empionatını Azərbaycan millisi 3 medalla başa vurub.

Mükafatlandırma mərasimindən sonra yığmamızın baş məşqçisi Rənad Əliyev turnirlə bağlı fikirlərini ProSport.Az-la bölüşüb.

“Bu dəfə 3 bürünc medal nəsibimiz oldu. Açığı, sürpriz medallarımız da oldu, maşallah olsun. Hətta bizim Aysel K10 qadınlarda 3-cü yerə çıxdı. Demək olar ki, 1 xal fərqi ilə finalı əldən buraxdı. İnşallah, gələn dəfə Aysel finalda da olacaq.

Eyni zamanda oğlanlarda K10 kateqoriyasında çıxış edən Qaybalıyev Fərrux ötən Avropa çempionatında üçüncü yer uğrunda medalı əldən buraxmışdı. Bu dəfə isə şükürlər olsun ki, gözləntilərimizi doğrultdu və bürünc medal uğrunda görüşdə qalib gəldi.

Digər idmançımız K30 kateqoriyasında, əlil arabasında yarışan Qarabağ qazisi Xalıqov Vidadi idi. O, yunan idmançısı ilə bürünc medal uğrunda görüşdə qalib gələrək üçüncü yeri tutdu.

Təbii ki, Emiliya haqqında da demək istərdim ki, o bizim favorit idmançımızdır. Artıq üçqat Avropa çempionu, dünya çempionumuzdur və komandanın kapitanıdır. Sadəcə, bizdən asılı olmayan səbəblərdən Dünya Karate Federasiyası müəyyən sənədlərdə dəyişiklik etmişdi və bu barədə bizə yarışa gəlməzdən cəmi bir həftə əvvəl məlumat verildi.

Federasiya tərəfi də sağ olsun, Azərbaycan Karate Federasiyası rəhbərliyi ilə birlikdə çalışdıq ki, bir həll yolu tapaq. Amma artıq gec idi, məlumat çox gec çatdırılmışdı.

Qismət olsun, inşallah gələn il Avropa çempionatına hazırlaşacağıq. Əminəm ki, Emiliya orada da həmişə olduğu kimi? Avropa çempionu olacaq və bayrağımızı ucaldacaq”.

Səbuhi Musa

Frankfurt