"Komandamız Fransada təşkil olunan beynəlxalq turnirdə Avropanın güclü akademiyalarına qarşı uğurlu çıxış etdi. Qrup mərhələsini məğlubiyyətsiz tamamlayaraq növbəti mərhələyə yüksəldik".

Bu sözləri Prosport.Az-a açıqlamasında "Qarabağ"ın U-17 komandasının baş məşqçisi Vüqar Əsgərli deyib.

Mütəxəssis komandasının Fransanın Bretinyol-sür-Mer regionunda keçirilən beynəlxalq turnirdəki çıxışını dəyərləndirib: "Komandamız qrupu 9 xalla 2-ci pillədə başa vurdu və pley-off mərhələsinə vəsiqə qazandı. Pley-off mərhələsində isə Fransanın tanınmış akademiyalarından olan "Nis" üzərində 2:1 hesablı qələbə qazanaraq həm xarakterimizi, həm də oyun keyfiyyətimizi nümayiş etdirdik. Növbəti mərhələdə "Ava" (Le Havre) ilə keçirilən oyunda 2:0 hesabı ilə məğlub olsaq da, bu turnir komandamız və futbolçularımız üçün çox önəmli beynəlxalq təcrübə oldu".

Əsgərlinin sözlərinə görə, yüksək tempdə keçirilən oyunlar, fərqli futbol məktəblərinə qarşı mübarizə və rəqabətli mühit futbolçuların inkişafı üçün vacib addımlardır: "Turnir boyunca komandamız oyun intizamı, kollektiv ruh, pressinq keyfiyyəti, topa sahibolma prinsipləri və xarakter nümayiş etdirdi. Bu cür beynəlxalq turnirlər futbolçularımızın gələcək inkişafında mühüm rol oynayır və onların daha yüksək səviyyəyə hazırlaşmasına böyük töhfə verir".

Baş məşqçi komandaya bu imkanı yaratdığı və daim dəstək göstərdiyi üçün klub rəhbərliyinə təşəkkür edib: "Futbolçularımıza inanırıq. Bu yol davam edir. Daha böyük hədəflər üçün çalışmağa davam edəcəyik".

Qeyd edək ki, "Qarabağ" beynəlxalq turnirdə 6-cı olub.