"Komandaya hədəflərə çatmaq üçün bütün lazımi şərait yaradılır".

Prosport.Az xəbər verir ki, bunu yunan-Roma güləşi üzrə Azərbaycan yığmasının baş məşqçisi Aleksandr Tarakanov Xorvatiyanın paytaxtı Zaqrebdə keçirilən Avropa çempionatından Vətənə qayıtdıqdan sonra jurnalistlərə deyib.

O, komandanın xaricdə, o cümlədən Xorvatiya və Gürcüstanda təlim-məşq toplanışı keçdiyini vurğulayıb:

“Məqsədlərdən biri də Avropa çempionatı idi. Bunun üçün səfərdə təlim-məşq toplanışı keçirdik. Yəni hazırda qarşımıza qoyulan bütün vəzifələri komanda ilə birlikdə yerinə yetirməyə çalışdıq”, – Aleksandr Tarakanov bildirib.

Baş məşqçi onu da vurğulayıb ki, millimizin üzvləri növbəti qələbələrə hazırdır.

“Ən əsası odur ki, uşaqlar yüksək nəticə əldə etmək məqsədi daşıyırlar”, – o əlavə edib.