Almaniyanın Frankfurt şəhərində keçirilən karate üzrə Avropa çempionatının 2-ci günü yarımfinala çıxmaqla Azərbaycanın kumite üzrə qadın millisi Dünya Kubokuna vəsiqə əldə edib.

Prosport.Az-ın Frankfurta ezam olunmuş əməkdaşının verdiyi xəbərə görə, Aysu Əliyeva, Fatimə Məmmədova, Gülay Orucova, Mədinə Sadıqova və İrina Zaretskadan ibarət qadın kumite millimiz bu gün 1/16 finalda Şotlandiyanı 2:1, 1/8 finalda Polşanı 2:1 və 1/4 finalda Yunanıstanı 2:0 məğlub edərək yarımfinala vəsiqə qazanıb. Komandamızın yarımfinaldakı rəqibi Rusiyanı (EKF-1) məğlub edən Fransa olacaq. Yarımfinal və final sabah keçiriləcək. 

Məhəmməd Allahverdiyev, Rahib Əzim, Turqut Həsənov, Vahid Həsənov, Nicat Kərimli və Rəşid Süleymanovdan ibarət kişi kumite komandamız isə İspaniya ilə gərgin keçən görüşdən qalib ayrılıb – 3:2. Komandamız sabah Şotlandiya ilə qarşılaşacaq.

Qeyd edək ki, Dünya Kuboku 20-22 noyabrda Çinin Hançjou şəhərində keçiriləcək. Dünya Kubokuna finalçılar, 2 bürünc medalçı və çempiona uduzmuş 5-ci komanda lisenziya qazanır.

Səbuhi Musa
Frankfurt