Almaniyanın Frankfurt şəhərində keçirilən karate üzrə Avropa çempionatının 2-ci günü Azərbaycan idmançısı Mədinə Sadıqova finala vəsiqə qazanıb.

Prosport.Az-ın Frankfurta ezam olunmuş əməkdaşının verdiyi xəbərə görə, 55 kq-da çıxış edən Mədinə əvvəlcə 1/16 finalda Adela Curma-Handlini (İngiltərə) 9:1, 1/8 finalda Ukrayna əsilli Kseniya Dronçankanı (Polşa) 2:0, 1/4 finalda isə Viola Lallonu (İtaliya) 8:4 məğlub edərək yarımfinala vəsiqə qazanıb. O, 1/2 finalda Neyra Sipoviçi 5:4 məğlub edərək finala vəsiqə qazanıb. 

Bununla da Mədinə Sadıqova ölkə idman karatesi (WKF) tarixində milliyyətcə azərbaycanlı olub, Avropa çempionatının finalına çıxan ilk qadın idmançımız olub. O, şənbə günü finalda türkiyəli Zümra Rezzan İmlə qarşılaşacaq.

Bu gün tatamiyə çıxan digər idmançılarımızdan Fatimə Məmmədova (50 kq) Patriçia Nastasa (Rumıniya) 0:6 uduzub. Bununla da o, turniri erkən başa vurub.

60 kq-da çıxış edən Aslan Dostuyev əvvəlcə Orqes Arifiyə (Albaniya) 4:2 qalib gəlsə də, Aleksandar Vuçkoviçə 3:4 uduzub. Gənc idmançımız bürünc medal qazanmaq üçün qatıldığı təsəlliverici yarışda Andreas Qavrieli (Kipr) 8:1 məğlub edib. Lakin bürünc medal görüşündə isə Balşa Voyinoviçə (Monteneqro) 2:7 uduzaraq medalsız qalıb.
Fərid Hacızadə (67 kq) da medalsız qalıb. O, ərəb əsilli Taha Beştiuini (İsveç) 8:2, Matey Belistoyanoskini (Şimali Makedoniya) 5:4 məğlub etsə də, Luka Mareskaya (İtaliya) 6:8 uduzub. O, təsəlliverici görüşdə Aleksandr Çapmoaleyə (Moldova) 0:9 uduzaraq medal şansını itirib.

Bu gün həmçinin, kata kişi millimiz də mübarizə aparıb. Komandamız İsveçrəni 6:1 məğlub etsə də, güclü İtaliyaya 0:7 uduzub. Təsəlliverici görüşdə isə Portuqaliya ilə bacarmaq mümkün olmayıb – 1:6.

Qeyd edək ki, bu gün qadın və kişi kumite millilərimiz də mübarizə aparacaq.

Səbuhi Musa 
Frankfurt