Xorvatiyanın paytaxtı Zaqrebdə keçirilən güləş üzrə Avropa çempionatı başa çatıb.

Prosport.Az ötən il Macarıstanın paytaxtı Budapeştdə keçirilmiş Avropa çempionatının nəticələri ilə indikini müqayisə edib.

Budapeşt-2022
Azərbaycan 16 medal qazanıb. Bunun 3-ü qızıl, 6-sı gümüş və 7-si bürünc medaldır. Türkiyədən sonra həm medal əyarına, həm də sayına görə 2-ci olmuşuq.
Sərbəst güləş millimiz 1 qızıl, 4 gümüş və 2 bürünc medal qazanmaqla 159 xalla Avropa çempionu olmuşdu.
Qadın güləş millimiz 1 gümüş medal qazanmış və ilk "10-luğ"a düşməmişdi.
Yunan-Roma güləş millimiz 2 qızıl, 1 gümüş və 5 bürünc medal qazanmaqla 165 xalla tarixində ilk dəfə Avropa çempionu olmuşdu.

Zaqreb-2023
Azərbaycan bu dəfə 2 medal az – 14 medal qazanıb. Ancaq əvəzində qızıl medallarımızın sayı bu dəfə 2 medal çox olub. Bunun 5-i qızıl, 6-sı gümüş və 3-ü bürünc medaldır. Yenə Türkiyədən sonra həm medal əyarına, həm də sayına görə 2-ci olmuşuq.
Sərbəst güləş millimiz 2 qızıl, 2 gümüş və 2 bürünc medal qazanmaqla 150 xalla ardıcıl 2-ci dəfə Avropa çempionu olub. Ötənilki Avropa çempionatı ilə müqayisədə 1 final az keçirmişik.
Qadın güləş millimiz 1 qızıl və 1 gümüş medal qazanmaqla bu dəfə ilk "10-luğ"a düşüb və 79 xalla 6-cı olub. Təbii ki, burada Mariya Stadnikin 9-cu Avropa çempionluğu əsas amil olub.
Yunan-Roma güləş millimiz 2 qızıl, 3 gümüş və 1 bürünc medal qazanmaqla 145 xalla bu dəfə Avropa 2-cisi olub. Amma bu dəfə "klassiklər"imiz düz 5 final görüşü keçirib.

Burdan belə qənaətə gəlmək olur ki, yunan-Roma güləş millimiz Avropa 2-cisi olsa da, bu komandada inkişaf artan templə gedir. Eldəniz Əzizli, Taleh Məmmədov və Sabah Şəriətinin final məğlubiyyətləri Avropa çempionluğunun qarşısını alıb. Əvəzində Budapeştdə bürünc medal qazanmış gənclər – Həsrət Cəfərov və Ülvü Qənizadə ümidləri doğruldub.