Niderlandın Dörne qəsəbəsində 16 yaşadək futbolçular arasında keçirilən Xeyriyyə Kuboku turnirində “Qarabağ” 9-cu olub.

Prosport.Az-ın Niderlanda ezam olunmuş əməkdaşının verdiyi xəbərə görə, komandamız 1 gündə 6 oyun keçirib.

Əvvəlcə “Qarabağ” qrupda təşkilatçı “Robinstayn" (Niderland) və “Anderlext”ə (Belçika) 0:1 və “Ayaks”a 0:6 uduzub.

Daha sonra komandamız turnirdə 9-12-ci yerlər uğrunda mübarizə aparıb. Əvvəlcə “Venlo” (Niderland) ilə 1:1 oynanılıb. Turnirdə Azərbaycan təmsilçisinin ilk qolunu Mehdi Hüseyn vurub.

Daha sonra “Qarabağ” “Union” (Belçika) üzərində ilk qələbəsini qazanıb – 2:1. Komandamızdan qolları Əhəd Hacızadə və Tunar Əsgərzadə vurub.

“Köhlən atlar” turnirdə son matçını “Xenk”ə (Belçika) qarşı keçirib. Görüş qolsuz heç-heçə ilə başa çatıb. Bu nəticə ilə “Qarabağ” 9-cu olub. 9-cu yer üçün kubok kapitan Əhəd Hacızadəyə təqdim edilib.

Finalda isə “Qarabağ”ın qrupdakı rəqibləri – “Ayaks” və “Anderlext” üz-üzə gəlib. Çempion 1:0 qalib gələn Belçika klubu olub.