"Basketbolçularımız çox yaxşı mübarizə apardılar. Oyunun böyük hissəsində həqiqətən ağıllı və yaxşı oyun sərgilədik. Ötən oyundakı kimi tələsib, səhvlər etmədik. Basketbolçularımız həm hücumda, həm də müdafiədə komanda oyunu sərgiləyib, əllərindən gələni etdilər".

Prosport.Az xəbər verir ki, bu sözləri "Abşeron Layns"ın baş məşqçisi Ərhan Tokər Azərbaycan Basketbol Liqasının final seriyasında "Sabah"a 108:95 hesabı ilə qalib gəldikləri 3-cü oyundan sonra deyib.

Türkiyəli mütəxəssis qələbəni şərh edib: "Lakin say olaraq az idik. Zədəlilərimiz var idi. Bir qədər yorulanda və ya foul problemi yaşayanda rəqib önə keçdi. Orada hissədə isə onsuz da bizim gücümüz azalmışdı. Təkrar reaksiya göstərə bilmədik. Amma oyunçularım parketdə göstərdikləri əzmlə, məncə, hər kəsə sübut etdi ki, əgər tam heyətlə mübarizə apara bilsəydik, "Sabah"la oyunlarda fərqli nəticələr ola bilərdi. Buna görə oyunçularımla qürur duyuram".

O, bu il yaxşı mövsüm keçirdiklərini bildirib: "Liqada cəmi 3 məğlubiyyətlə finala gəlib çıxmışdıq. İlk dəfə avrokubokların qrupunda çıxış etdik və Azərbaycanı layiqincə təmsil etdik. Kubokdakı uğursuzluq xaric, hədəfimizə çatdıq deyə bilərəm. Bütün oyunçular, məşqçilər korpusu, rəhbər şəxslər, həkim və mətbuat xidməti daxil hər kəs mövsüm boyu əlindən gələnin ən yaxşısını etdi və komandanın uğurlarında pay sahibi oldu. Buna görə əməyi keçən hər kəsə təşəkkür edirəm. "Sabah"ı növbəti çempionluqları münasibətilə təbrik edirəm. Mövsüm ərzində gözəl oyun sərgilədilər və bizə qarşı matçlarda da qələbə qazanıb çempionluğu qazandılar. Bir daha rəqibimizi təbrik edirəm".