"Qarabağ"ın daha bir komandası beynəlxalq turnirdə mübarizə aparacaq.

Prosport.Az-ın xəbərinə görə, 17 yaşadək komanda (U-17) Fransada – Atlantik okeanının sahilində yerləşən Bretinyol-sür-Mer adlı regionda keçiriləcək beynəlxalq turnirdə çıxış edəcək.

Vüqar Əsgərlinin baş məşqçisi olduğu komanda "Turnuva İnterneyşnl"da (Tournoi International) yarışacaq. Azərbaycan təmsilçisi B qrupunda mübarizə aparacaq.

Rəqiblər Fransanın "Red Star", "Nonter" (ES Nanterre) və "Plezir" (FO Plaisir) komandaları olacaq. Bundan başqa, "Nitsa", "Reyms" və "Loryan" kimi tanınmış Fransa klubları, braziliyalı oyunçulardan ibarət komanda da yarışacaq.

"Qarabağ" mayın 15-də "Nonter"lə (Bakı vaxtı ilə saat 18:35), mayın 16-da "Plezir" (saat 12:50) və "Red Star"la (saat 19:20) qarşılaşacaq. Yalnız qrup qalibləri yarımfinala adlayacaq. Yarımfinal və final görüşləri mayın 17-də keçiriləcək.

Qeyd edək ki, daha öncə "Qarabağ"ın U-16 komandasının mayın 12-də İstanbulda "Başakşəhər"lə yoxlama oyunu keçirəcəyini və Niderlandda 13-15 mayda Xeyriyyə Kuboku turnirində çıxış edəcəyini yazmışdıq.

Səbuhi Musa