“Qarabağ”ın U-16 komandası Niderlandın Dörne qəsəbəsində "Robinstayn" klubunun təşkil etdiyi "Xeyriyyə Kuboku" (Charity Cup) turnirində iştirak edəcək.

Prosport.Az-ın xəbərinə görə, Rauf Əliyevin baş məşqçisi olduğu bu komanda turnirə yollanmazdan əvvəl mayın 12-də İstanbulda "Başakşəhər"lə yoxlama oyunu keçirəcək. 

Daha sonra "Qarabağ" mayın 13-15-də "Dörne Sportpark" İdman Mərkəzində Avropanın müxtəlif ölkələrindən 12 komanda mübarizə apardığı "Xeyriyyə Kuboku"nda yarışacaq.

C qrupunda mübarizəyə qatılacaq “Qarabağ” Belçikanın "Anderlext", Niderlandın "Ayaks" və turnirin təşkilatçısı "Robinstayn" klubları ilə qarşılaşacaq.

Qrupda ilk 2 yeri tutan və ən yaxşı nəticə göstərən iki 3-cü yer sahibi 1/4 final mərhələsinə vəsiqə qazanacaq. İştirakçılar arasında adıçəkilən komandalarla yanaşı, Almaniyanın "Borusiya" (Dortmund), Fransanın "Lill", Belçikanın "Xenk" (Genk), "Antverpen", "Union", Niderlandın "Zvole", "Venlo" və "Helmond Sport" klubları da var.

Qeyd edək ki, "Qarabağ"ın bu yaş qrupu çempionatda sona 1 tur qalmış 2-ci sıradadır. Son turda "Sumqayıt"la səfər matçının nəticəsindən asılı olmayaraq, "köhlən atlar"ın yarışı gümüş medallarla başa vuracağı dəqiqləşib.