Azərbaycan Boks Federasiyasının yeni vitse-prezidentinin kimliyi müəyyənləşib.
Prosport.Az-ın xəbərinə görə, fevralda Azərbaycan Avtomobil Yolları Dövlət Agentliyinin İdarə Heyətinin sədri təyin olunmuş Vüsal Nəsirlini (əmək və əhalinin sosial müdafiəsi nazirinin sabiq müavini) vitse-prezident postunda Natiq Həsənov əvəzləyib.
Natiq Həsənov kimdir?
N.Həsənov 1979-cu ildə anadan olub, Azərbaycan Respublikasının Prezidenti yanında Dövlət İdarəçilik Akademiyasının Dövlət və bələdiyyə idarəetməsi fakültəsini bitirib, Dövlət İqtisad Universitetində magistr təhsili alıb.
O, 2008-2011-ci illərdə İqtisadiyyat Nazirliyində Sahibkarlığın inkişafı siyasəti şöbəsində məsləhətçi, 2011-2012-ci illərdə İqtisadiyyat Nazirliyinin İqtisadi siyasət, təhlil və proqnozlaşdırma şöbəsində Qeyri-neft sahələrinin inkişafı sektorunun müdiri, 2012-2018-ci illərdə İqtisadiyyat Nazirliyinin Dövlətlərarası iqtisadi əməkdaşlıq şöbəsinin müdiri, 2018-ci ildən isə Kiçik və Orta Biznesin İnkişafı Agentliyinin İdarə Heyəti sədrinin I müavini vəzifələrində işləyib.
Ötən ilin martın 10-da maliyyə naziri Sahil Babayevin müvafiq əmri ilə Maliyyə Nazirliyinin Aparatının rəhbəri təyin edilib. Azərbaycan Respublikası Prezidentinin 8 yanvar 2026-cı il tarixli Sərəncamı ilə maliyyə nazirinin müavini təyin olunub. O, Azərbaycan Respublikası Prezidentinin Sərəncamı ilə 2019-cu ildə “Tərəqqi" medalı” ilə təltif edilib.
Digər vitse-prezident Vaqif Kazımov isə 2024-cü ildə vitse-prezident seçilmiş iş adamı Vasif İsmayılovu əvəzləyib. 2008-ci ildən Prezidentin fərdi təqaüdçüsü olan Vaqif Kazımov yeniyetmə oğlan boksçulardan ibarət millimizin baş məşqçisi, Ağası Məmmədovun şəxsi müəllimidir. O, 2022-ci ildə Boks Federasiyasında Məşqçilər Komitəsinin sədri təyin olunub.
Qeyd edək ki, federasiyanın prezidenti əvvəlki tək maliyyə naziri Sahil Babayev seçilib (2022-ci ildə seçiləndə əmək və əhalinin sosial müdafiəsi naziri idi). İdarə Heyətində isə əvvəl olduğu kimi Rövşən Hüseynov (boks üzrə Avropa çempionu və Dünya Kubokunun sahibi) və Fuad Hacıyev (Azərbaycan İdman Akademiyasının rektoru) də təmsil olunur.
Səbuhi Musa
