"Yaxşı oynadıq, yaxşı mübarizə apardıq. Sadəcə sonluğu gətirə bilmədik".

Prosport.Az xəbər verir ki, bu sözləri "Abşeron Layns"ın baş məşqçisi Ərhan Tokər Azərbaycan Basketbol Liqasının final seriyasında "Sabah"a 93:98 hesabı ilə uduzduqları ilk oyundan sonra deyib.

Türkiyəli mütəxəssis məğlubiyyəti belə şərh edib: "Ceylon Şoudan sonra Saadettin Donat da zədələnərək sıradan çıxmışdı.

Orelik Gediminas oyun gününə qədər xəstə idi. Müalicə alaraq özünə gəlməyə çalışırdı.Hətta oyundan sonra hərarəti 40 dərəcəyə qədər yüksəlib və xəstəxanaya yönləndirilib. Ceyms Freyzer isə öncədən bilirsiniz, "Neftçi" ilə oyunda zədə aldı və əli şişmişdi, amma bu oyuna çıxdı. Bizim mərkəz mövqeyində potensial oynada biləcəyimiz cəmi 3 basketbolçumuz qaldı. Orelik Gediminas, Nicat Məmmədli və Arinze Çidom. Ore gördüyünüz kimi çətinlik çəkdi, Arinze Çidom foul limitinə yaxınlaşdıqda onu parketdən aldım və rəqib də uzun oyunçularla məhz mərkəzə yüklənməyə başladı. Buna görə də önə keçdilər. Məhz bundan sonra da onlar bir qədər də sərtliyi artırdı. Biz isə buna qarşılıq verə bilmədik. Sonda hesab yaxın olsa da, məğlub olduq".

O, mübarizə əzminə görə basketbolçularına təşəkkür edib: "Onlarla qürur duyuram. Qarşıdakı oyuna qədər heyətimizdə sağlam oyunçuların sayı artsa, yenidən qələbə üçün əlimizdən gələni edəcəyik. "Sabah"ı  təbrik edirəm. Yaxşı mübarizə aparıb qalib gəldilər. Təbii ki, heyətləri daha geniş idi. Seriyanın davamında işimiz asan olmayacaq, amma qələbə üçün nə lazımdırsa, edəcəyik".