"Final seriyasında həm psixoloji, həm də fiziki baxımdan hazırlıqlı olmalısan. Oyuna bir qədər ehtiyatsız başladıq. Rəqibin də oyununu qeyd etmək lazımdır. "Absheron Layns" taktiki cəhətdən çox yaxşı oynadı".

Prosport.Az xəbər verir ki, bu sözləri "Sabah"ın baş məşqçisi Rimas Kurtinaytis Azərbaycan Basketbol Liqasının final seriyasında "Absheron Layns"a 98:93 hesabı ilə qalib gəldikəri oyundan sonra deyib.

Litvalı mütəxəssis qələbəni şərh edib: "Basketbolçularımıza oyun ritmindən düşmədikləri və sona qədər soyuqqanlı davrandıqları üçün təşəkkür edirəm. Uzun müddət hesabda geri olmağımıza baxmayaraq təmkinlə mübarizə apardılar. Məhz bunun sayəsində son periodda vəziyyəti öz xeyrimizə dəyişməyi bacardıq. Seriyaya qələbə ilə başlamaq üstünlükdür. Amma biz artıq bu qələbəni unudub növbəti görüşə köklənməliyik".