Azərbaycanın sərbəst güləşçisi İslam Bazarqanov Albaniyanın paytaxtı Tiranada keçirilən Avropa çempionatında finala vəsiqə qazanıb.
Prosport.Az xəbər verir ki, 57 kq çəki dərəcəsində mübarizə aparan təmsilçimiz yarımfinalda gürcüstanlı Roberti Dinqaşviliyə 11:1 hesabı ilə qalib gəlib.
Digər güləşçimiz Cəbrayıl Hacıyev (79 kq) isə yarımfinalda Maqamedxabib Kadimaqamedova (UWW) 1:5 hesabı ilə uduzub. O, 3-cü yer uğrunda görüşdə qüvvəsini sınayacaq.
15:41
Azərbaycanın 2 sərbəst güləşçisi Albaniyanın paytaxtı Tiranada keçirilən Avropa çempionatında yarımfinala yüksəlib.
Prosport.Az xəbər verir ki, İslam Bazarqanov (57 kq) və Cəbrayıl Hacıyev (79 kq) 1/4 finalda rəqiblərinə qalib gələrək növbəti raunda vəsiqə qazanıblar.
Rəşid Babazadə (65 kq) və Kənan Heybətov (70 kq) 1/4 finalda, Osman Nurmaqomedov (97 kq) isə təsnifat mərhələsində uduzublar.
Bu gün, həmçinin Azərbaycanın qadın güləşçiləri Jalə Əliyeva (57 kq), Ruzanna Məmmədova (62 kq) və Birgül Soltanova (65 kq) bürünc medal uğrunda görüşdə qüvvələrini sınayacaqlar.
Qeyd edək ki, Azərbaycan aprelin 26-dək davam edəcək Avropa çempionatında 25 güləşçi ilə təmsil olunur. İndiyədək yunan-Roma güləşçilərindən Həsrət Cəfərov (67 kq) və Qurban Qurbanov (82 kq) Avropa çempionu olublar, Nihat Məmmədli (60 kq), Rəşad Məmmədov (55 kq) və İslam Abbasov (87 kq) bürünc medal qazanıblar. Qadınların güləşində isə Günay Qurbanova (59 kq) Avropa üçüncüsü olub.
10:07
Azərbaycanın 5 sərbəst güləşçisi Albaniyanın paytaxtı Tiranada keçirilən Avropa çempionatında bu gün mübarizəyə start verir.
Prosport.Az xəbər verir ki, İslam Bazarqanov (57 kq), Rəşid Babazadə (65 kq), Kənan Heybətov (70 kq), Cəbrayıl Hacıyev (79 kq) və Osman Nurmaqomedov (97 kq) xalça üzərinə çıxacaqlar.
Bundan əlavə, bu gün Azərbaycanın üç qadın güləşçisi bürünc medal uğrunda görüşdə qüvvəsini sınayacaq. Jalə Əliyeva (57 kq), Ruzanna Məmmədova (62 kq) və Birgül Soltanova (65 kq) qitə birinciliyində 3-cü yeri tutmağa çalışacaq.
Xatırladaq ki, daha əvvəl yunan-Roma güləşçilərindən Həsrət Cəfərov (67 kq) və Qurban Qurbanov (82 kq) qızıl, Rəşad Məmmədov (55 kq), Nihat Məmmədli (60 kq), İslam Abbasov (87 kq) bürünc medal qazanıblar. Azərbaycanın yunan-Roma güləşi millisi komanda hesabında birinci olub. Qadınlardan isə Günay Qurbanova (59 kq) bürünc mükafata sahib çıxıb.