Azərbaycanın 3 yunan-Roma güləşçisi Albaniyanın paytaxtı Tiranada keçirilən Avropa çempionatında yarımfinala yüksəlib.

Prosport.Az xəbər verir ki, Nihat Məmmədli (60 kq), Həsrət Cəfərov (67 kq) və Qurban Qurbanov (82 kq) 1/4 finalda öz rəqiblərinə qalib gəliblər.

Ruslan Nurullayev (72 kq) və Murad Əhmədiyev (97 kq) isə həmin mərhələdə uduzublar. Onların məğlub olduqları rəqiblər finala çıxsalar, güləşçilərimiz bürünc medal uğrunda təsəlliverici görüşlərə qatılmaq imkanı əldə edəcəklər.

Bu gün, həmçinin Rəşad Məmmədov (55 kq), İslam Abbasov (87 kq) və Beka Kandelaki (130 kq) bürünc medal uğrunda yarışacaqlar.

Qeyd edək ki, Azərbaycan aprelin 26-dək davam edəcək Avropa çempionatında 25 güləşçi ilə təmsil olunur.

09:00

Azərbaycanın daha 5 yunan-Roma güləşçisi Albaniyanın paytaxtı Tiranada keçirilən Avropa çempionatında bu gün mübarizəyə start verəcək.

Prosport.Az xəbər verir ki, yarışın 2-ci günündə Nihat Məmmədli (60 kq), Həsrət Cəfərov (67 kq), Ruslan Nurullayev (72 kq), Qurban Qurbanov (82 kq) və Murad Əhmədiyev (97 kq) xalça üzərinə çıxacaqlar.

Cəfərov daha əvvəl 3, Məmmədli 2, Qurbanov 1 dəfə qitə çempionatında qızıl mükafat əldə ediblər.

Bundan əlavə, Rəşad Məmmədov (55 kq), İslam Abbasov (87 kq) və Beka Kandelaki (130 kq) bürünc medal uğrunda görüşlərə çıxacaqlar.

Avropa çempionatı aprelin 26-da başa çatacaq.