"Bugünkü matç əslində bizim üçün bütün mövsümün icmalı kimi idi. Yaxşı basketbol oynadıq, yaxşı mübarizə apardıq, amma sonluğa gücümüz çatmadı".

Prosport.Az xəbər verir ki, bu sözləri "Şəki"nin baş məşqçisi Bedri Meriç Azərbaycan Basketbol Liqasının 1/4 final mərhələsində "Abşeron Layns"a 94:105 hesabı ilə uduzduqları 2-ci oyundan sonra deyib.

Türkiyəli mütəxəssis məğlub olduqları matçla bağlı fikirlərini bölüşüb: "Bu mövsüm hər şey bizim üçün belə oldu. Sonunadək döyüşdük, pley-off hədəfimizə çatdıq, amma bura qədər imiş. Yaxşılar ayaqda ölər. Biz bu cür sonuna qədər əlimizdən gələni etdik".

O, bu mövsüm bütün zəhmətləri üçün oyunçularımın hər biri ilə fəxr etdiyini və onlara minnətdar olduğunu bildirib: "2 il burada olduğum müddətdə sonadək yanımda olub, zəhmət çəkən bütün komanda heyətinin hər birinə ayrılıqda ürəkdən təşəkkür edirəm. Bundan başqa, Azərbaycan Basketbol Federasyonuna bu mövsüm bizlərə göstərdiyi bütün dəstək üçün minnətdaram".

Xatırladaq ki, ilk görüşdə 109:78 hesabı ilə üstün olan "Abşeron Layns" yarımfinala yüksəlib.