"Hər şeydən öncə Türkiyədə baş verən məlum olayla bağlı həyatlarını itirənlərə Allahdan rəhmət diləyir, yaxınlarına başsağlığı verirəm. Çox üzgün şəkildə oyuna çıxdım".

Prosport.Az xəbər verir ki, bu sözləri "Gəncə"nin baş məşqçisi Halil Atlı Azərbaycan Basketbol Liqasının 1/4 final mərhələsində "Ordu"ya 85:78 hesabı ilə qalib gəldikləri oyundan sonra deyib.

Türkiyəli mütəxəssis bildirib ki, matçla bağlı uzun danışılacaq bir şey yoxdur: "Məncə, meydanda xarakter göstərdik. Amma digər tərəfdən hakimlərin ünvanına söyləniləcək bir fikir varsa, kaş ki, bu mövsümü yerli hakimlərlə davam edərdik. Çünki çox yaxşı idarəçilik oldu. Onların əməyi, bacarığı böyükdür. Bugünkü matçda çox asan şəkildə oyundan atıldım. Hakimlərlə ünsiyyət, rabitə belə qura bilmədik. Oyunu şərh etməyəcəm. Hər şey ortadadır, çalınmayan fitlər var. Komandamı, köməkçilərimi təbrik edirəm. Məşqçilər məndən sonra komandaya çox dəstək oldular. Bir oyun daha var. Ora konsentrasiya olacağıq. Turu keçmək üçün nə lazımdırsa, edəcəyik".

Qeyd edək ki, bu komandalar arasında ilk görüşdə "Ordu" qələbə qazandığı (108:106) üçün yarımfinala yüksələcək kollektiv 3-cü görüşdə müəyyənləşəcək.