"Rəqibi təbrik edirəm. Oyun boyu yaxşı mübarizə apardılar. Ümumiyyətlə, hər iki komanda yaxşı çıxış etdi. Həm onların, həm bizim axsadığımız məqamlar oldu".

Prosport.Az xəbər verir ki, bu sözləri "Gəncə"nin baş məşqçisi Halil Atlı Azərbaycan Basketbol Liqasının pley-off mərhələsinin "Ordu" ilə ilk oyunundan sonra deyib.

Türkiyəli mütəxəssis 106:108 hesabı ilə uduzduqları matçla bağlı fikirlərini bölüşüb: "Oyuna görə öz basketbolçularıma da təbriklərimi çatdıram. Bu, bizim cari mövcümdə uzatmalara gedən 2-ci belə matçımızdır. Səfərdə əlavə hissələr oynamaq asan deyil. Komandamız mübarizəni buraxmadı. Möhtəşəm oynadıq. Amma 1-2 sadə səhv nəticəyə təsir etdi. Diqqətimi çəkən şeylərdən biri "field goals"da rəqibimizdən 21 top daha çox yararlanmağımızdır. Buna baxmayaraq oyunu uduzduq. Harada yanlış etdiyimizin təhlilini aparıb 2-ci oyuna hazırlaşacağıq. Atış faizinin aşağı olması istər-istəməz bizi yaraladı. Belə olan halda səfərdə bu cür rəqibə qarşı qalib gəlmək asan görünməsin. Səhvlərimizi düzəldərək evdə qələbə qazanıb seriyanı davam etdirmək istəyirik".